Est nàschidu in Codronzanos sa die de Mesaustu de su 1908. Comente si usaiat tando, pro netzessidade, cumprit sa prima elementare pro andare a fàghere su "teraccheddu accarzu".  A seig'annos faghet su manovale in s'Argentiera, a bint'annos partit militare de leva. Si cojuat cun Buciana Serra in su 1936; a pustis de unu mese partit comente volontàriu in Àfrica orientale inue istat un annu. Torrat a partire in Àfrica su deghe de làmpadas de su 1939, ruet prisoneri su 21 de maju de su 1941 e faghet chimb'annos de prisonia in Chènia e in Sud Àfrica. In cussos annos andat a iscola: “…pro a mie s'iscola fit de cunfortu…, dae sos pachetos de sas sigaretas faghimis sos cuadernos, lo segaimis bene e los cosimis, fint de binti pàginas cadaunu…..”.  Torrat lìberu a Codronzanos in su mese de cabudanni de su 1946. Traballat in campagna, apassionadu de poesia iscriet tota vida, fintzas a oe.